ಕಲ್ಮಡ್ಕದಲ್ಲಿ ಹತ್ತು ವರ್ಷ

ನಾನು ಕಲ್ಮಡ್ಕ ಗ್ರಾಮಕ್ಕೆ ವಾಸಕ್ಕೆ ಬಂದು ಹತ್ತು ವರ್ಷಗಳಾದವು. ನಾನು ಹುಟ್ಟಿದ್ದು ಈ ಊರಿನಲ್ಲಿ ಅಲ್ಲವಾದರೂ ಬೆಳೆದದ್ದು ಇಲ್ಲಿ. ಆದರೆ  2000ನೇ ಇಸವಿಯಲ್ಲಿ ಇಲ್ಲಿಗೆ ಬಂದಾಗ ಈ ಊರು ಬಿಟ್ಟು 35 ವರ್ಷಗಳೇ ಆಗಿದ್ದವು. ಅಷ್ಟು ವರ್ಷಗಳನ್ನು ಮೈಸೂರು, ಬೆಂಗಳೂರು, ದೆಹಲಿ ಮೊದಲಾದ ನಗರಗಳಲ್ಲಿ ಕಳೆದಿದ್ದೆ. ನಗರ ಜೀವನ ನಡೆಸುತ್ತಿದ್ದಾಗ ಎರಡು ವರ್ಷ ಯಾವುದಾದರೂ ಹಳ್ಳಿಯಲ್ಲಿ ಕಳೆಯಬೇಕು ಅನ್ನಿಸುತ್ತಿತ್ತು. ಯಾಂತ್ರಿಕವಾದ ಜೀವನ ಮತ್ತು ಯೋಚನಾಕ್ರಮಕ್ಕೆ ಅದೊಂದು ಚಿಕಿತ್ಸೆ ಆಗಬಹುದು, ಒಂದು ವೇಳೆ ಆಗದೆ ಇದ್ದರೆ ಹಳ್ಳಿಯಲ್ಲಿ ವಾಸಿಸಬೇಕೆಂಬ ಆಸೆಯನ್ನಾದರೂ ತೀರಿಸಿಕೊಂಡಂತಾಗುತ್ತದೆ ಎನ್ನಿಸುತ್ತಿತ್ತು. ಹೀಗೆ ಇಲ್ಲಿಗೆ ವಾಸಕ್ಕೆ ಬಂದಾಗ ನನ್ನ ಮನಸ್ಸಿನಲ್ಲಿದ್ದದ್ದು ಎರಡು ವರ್ಷ ಕಾಲ ಇಲ್ಲಿ ವಾಸಿಸಬೇಕು ಎಂದು ಮಾತ್ರ. ಆದರೆ ಬಂದ ಮೇಲೆ ಈ ಊರು, ಇಲ್ಲಿನ ಜನ ಇಷ್ಟವಾಗಿ ಹತ್ತು ವರ್ಷದಿಂದ ವಾಸಿಸುತ್ತಿದ್ದೇನೆ. ಸದ್ಯ ಇಲ್ಲಿಂದ ಹೊರಡುವ ಯೋಚನೆ ಇಲ್ಲ.

ಈ ಹತ್ತು ವರ್ಷಗಳಲ್ಲಿ ಅಡಿಕೆ, ತೆಂಗು, ಕೊಕ್ಕೊ, ಬಾಳೆ, ಗೇರು ಬೀಜ, ಕಾಳು ಮೆಣಸು ಕೃಷಿ ಮಾಡಿದೆ. ಕಾಡು ಪ್ರಾಣಿಗಳ ಜೊತೆ ಸೆಣಸಿದೆ. ಬಾವಿ ತೆಗೆಸಿದೆ. ಮನೆ ಕಟ್ಟಿಸಿದೆ. ಸಾಕಷ್ಟು ಬರೆದೆ. ಅನೇಕ ವರ್ಷಗಳಿಂದ ಬರೆಯಬೇಕೆಂದಿದ್ದುದರ ಬಹುಭಾಗ ಬರೆದೆ. ಅವು ಮತ್ತು ಹಿಂದಿನ ಬರೆವಣಿಗೆ ಒಟ್ಟು ಸೇರಿ ಇಪ್ಪತ್ತು ಸಂಪುಟಗಳಲ್ಲಿ ನನ್ನ ಬರೆವಣಿಗೆಗಳು ಮುಂದಿನ ನಾಲ್ಕು ವರ್ಷಗಳಲ್ಲಿ ಪ್ರಕಟವಾಗಲಿವೆ. ಅದರ ಮೊದಲ ಕಂತಾಗಿ ನನ್ನ ಸಮಗ್ರ ನಾಟಕಗಳ ಸಂಪುಟ 2, 3, 4 ಮತ್ತು ಒಂದು ಕವನ ಸಂಗ್ರಹ ಈ ವರ್ಷ ಅಕ್ಟೋಬರ್ ತಿಂಗಳಲ್ಲಿ ಪ್ರಕಟವಾಗಲಿವೆ. ಸಮಗ್ರ ನಾಟಕಗಳ ನಾಲ್ಕು ಸಂಪುಟಗಳಿಂದ ಒಟ್ಟಿಗೆ  ಹನ್ನೊಂದು ನಾಟಕಗಳಿವೆ. ಇವುಗಳಲ್ಲಿ ಹೆಚ್ಚಿನವು ಅಪ್ರಕಟಿತ ನಾಟಕಗಳು. ಕವನ ಸಂಗ್ರಹದಲ್ಲಿ 2003ರಲ್ಲಿ ಪ್ರಕಟವಾದ ನನ್ನ ಸಮಗ್ರ ಕಾವ್ಯ ಮಾತಾಡುವ ಮರದ ನಂತರ ಬರೆದ ಕವನಗಳಿವೆ.

ಈ ಬ್ಲಾಗಿನಲ್ಲಿ ಕೃಷಿಕನಾಗಿ, ಅಧ್ಯಾಪಕನಾಗಿ, ಪತ್ರಕರ್ತನಾಗಿ, ಲೇಖಕನಾಗಿ ನನ್ನ ಅನುಭವ, ವಿಚಾರಗಳನ್ನು ನಾನು ನಿಮ್ಮೆದುರು ಸಾದರ ಪಡಿಸಲಿದ್ದೇನೆ. ಬಹುಶ: ವಾರಕ್ಕೊಮ್ಮೆ. ಸೋ__ಮುಂದಿನ ಭೇಟಿಯ ವರೆಗೆ__ನಮಸ್ಕಾರ.